Noochruef Willy Flury

 

Dr Willy isch am 28. Jänner 1948 uff d Wält koo und im Elterehuus am Rhy, in dr nööchi vo dr Vogel Gryff Fääri, im Glaibaasel uffgwaggse.

Die erschte Schritt in der Glygge muss är anfangs 90-ziger im Stamm versuecht haa. Är isch ämmel am „Morgestraich 1991 - by dr Fyyr 700-Joor Eidgenossenschaft“ in Brunnen und 1992  in der „Wettstai Festbaiz 600-Joor Glai- und Groossbaasel zämme“ derbyy gsi. Sy ganz groosse Wuurf het är 1995 als OK-Scheff vom Glygge Grümpeli glaischdet, wo under dr Regie vo dr Wettstai Clique duregfiert woorde isch.

Wo ych 2003 dr Willy in dr Alte Garde kenne gleert haa, isch är in dr Facilitybranche tätig gsi. Als Usslandschwiizer het är, zerscht im e Betrieb in Wuppertal und spööter in dr aigene Firma z Hamburg, sy Lääbensunterhalt verdient. Sy Lääbesmittelphunggt het är bis zletscht in Ham-
burg bhalte. Baasel und d Faasnacht het är mit sym Zwaitwoonsitz nit uss de Auge verloore.

Ze unsere gmainsame Zyt haa ych dr Willy als uffgstellte fröölige Mensch erlääbt. Dr Höhe-phunggt in sym Glyggelääbe sinn sicher syni 3 Joor Dambuurmajoor vo 2004-2006 woorde. Stolz het dr Willy als Bundesroot Couchepin, denn als HD Läppli oder als Selmeli Ratti sowie am Faasnachtsbummel 2006 - im zwaite Haimatoort Hägendorf - d Wettstai Clique Alti Garde aagfiert. Im Juli 2006 am Eidg. Pfyffer-und Dambuurefescht, het är au d Hypokras mit sym Stägge am Umzuug dur d Gasse gfiert. Als Wuurzegraaber isch är sälte bym e Kämmerli ewägg blyybe.

Laider isch es in de letschte Joor um e Willy rueiger woorde. Voor dr daasjeerige Marschiebig in dr G80 het dr Adrian dr Wettstaimarsch aagsait. Dä isch denn als Videobotschafft mit de beschte Wüntsch zer Besserig an Willy wyterglaidet woorde. Nooch ere lange schwääre Granggeszyt het dr Willy d Glygge am Frytig, 26. Abrille 2024 für allewyyl verloo.

Hummel-Hummel Willy            Mors-Mors Digge Pfyffer

mit gligge findsch do Foti vom Alti Garde Dambuurmajoor Willy als Bundesroot Couchepin 2004, als HD Läppli 2005, als selmeli Ratti 2006 und uff em Bummel in sym zwaite Haimatoort z Hägendorf und uff dr Gass z Basel z.T mit de Knorzi. Am Eidg. Dambuure- und Pfyfferfescht z Basel im 2006 het är au d Hypokras um Umzuug aagfiert.

<  <  <