Dr Voorstand het gmäss däm Flyer uff die siibni Zoobe in deggte Voorgaar- te vom Reschtorant Schlipf yyglaade. Döört isch me an zwai äng gstuelte Disch zämmegsääse und het sich loo wool sy.
Noochdäm alli yydroffe und bedient gsi sinn, het dr Gröösse zem Yystoo uffgrueffe. Wie allewyyl ischs e Wyyli gangge bis s Spiil, zur fyyrlige Stäg-geübergoob uff em undere Blätzli, d Inschtrumänt baraad kaa het.
Zerscht het dr Gröösse is e Voortraag ghalte, waas e Dambuurmaioor für e Uffgoob het und für waas dä zueständig isch. Daas isch für uns alti Wettstai Gniembbi eppis völlig Neus gsi. Drum simmer froo, dass mr jetzt um e Eerfaarig ryycher sinn! No däre Episode het är zerscht dr Wettstai-marsch aagsait. D Priska Keller het en korrigiert, womit mit em Aasaage vom Glopfgaischt dr Däni Gross syni Dambuurmaioorkarriere wüürdig ab-gschlosse het.
Dr Oobmaa Thomas het in syner Reed gmaint, ass me by dr Gniembbi-gründig froo gsi isch mit dr zwaijeerige Zuesaag vom Gröösse als Maioor. De hesch dä Job zwar uff e ungwoonti Art, mit dym Lüüchtschwäärt am Morgestraich, umgsetzt. Drotz däre unbassende und unmystische Liecht-schau, möcht ych Diir für dy Yysatz mit däm Innerstadtguetschyyn dangge.
Noochhär het dr Altstammdambuurmaioor Thomas em Pius die wysse Händsche in Väärsform übergää.
Nooch em aanestregge vom Banner dur e Fäänrich Roman, isch vom Gröösse dr Dambuurmaioorstägge über s Banner fyyrlig an Pius übergää woorde. Bivoor är sy allererschte Marsch het könne aasaage, het em sy Frau Priska voorglääse, ass är vom Voorstand e Guetschyyn bikunnt. Mit däm kaa är, im Schützemattphargg am 12. Sebdämber 2026, leere dr Stägge wäärfe, fange, draie usw. No all däne Reede und Väärsli voorlääse, het dr Pius dr Wettstaimarsch aagsait und mit em elegante Abwingge, dä in dr Wettstai sälte Stäggeübergoobaggt, abgschlosse.
Drmit isch dr brotokollarisch Dail vo dr Stäggeüübegoob duure gsi. So isch me - scho an die beschryybene - Disch ze Spyys und Drangg gsässe. Dr Priska Keller e häärz-ligs Danggerschöön für d Organisazioon vo däm schööne Wettstai Gniembbi Aaloss
