Wohär kemme und wär sinn mir?

D Wettstai-Clique Basel 1952 isch kurz no dr Fasnacht am 18. Abrille 1952 im Sääli vom Reschtorant zem Gifthüttli vo abgsprungene junge Lälli gründet woorde. Wettstai-Clique, wel doomools zaalryychi Jugendligi no im Glaibasel gwoont hänn. Au dr legendäri Johann Rudolf Wettstai isch by dr Nammensgäbig mit sym Wirgge fir d Stadt im Voordergrund gstande. Rasch het sich d Wettstai-Clique zenere allsyts anerkannte Stamm-Clique entwigglet. Sogar dr Kischtlivater Noldi Schneider het me kenne überzüge, dass au d Waisebuebe jetzt zer Wettstai in d Drummel- und Pfyfferschuel selle ko.

Im Joor 1962 sinn d Wettstai- Knorzi gründet woorde. Dr Überdritt in Stamm wiird mit em 18. Lääbensjoor vollzooge. Sogar dr Kischtlivater Noldi Schneider het me kenne überzüge, dass au d Waisebuebe jetzt zer Wettstai in d Drummel- und Pfyfferschuel selle ko.

Die Junge vo 1952 sinn elter woorde. Fümf hänn sich an ere Sitzig im Rhyfälderhoof am 4. Oggdoober 1988 entschii-de dr Cortège gmietliger aazgoo. Drum hänn si denne d Wettstai Alti Garde mit em Namme "Wettstai- Gniembbi“
gründet. E so sinn am Morgestraich vom 13. Hornig 1989 vierzää Wettstai- Gniembbi abmarschbereit yygstande.
Dr Namme und Zwägg vo dr Glygge sinn in Richtlinie feschtghalte. D Grundlaag ze de Richtlinie bilde d Statute vom Stammverain. Entsprächend däne findet als oberschts Organ d Generalversammlig statt. D Uusnaam bildet die 10. Uusgoob; die isch mit eme Ständeli vo dr Stammglygge und eme Banggett umraamt woorde.


















An dr 12. Generalversammlig isch uff Wuntsch vo dr Meerhait vo de Aggtivmitgliider dr Namme Wettstai- Gniembbi begraabe und in „Wettstai Clique Alti Garde“ umgwandlet woorde. Uus de aafänglig 14 Aggtivi sinn zwischezytlig 44 woorde. An dr 6.Glygge- Fasnacht het s erscht Mool die doomooligi Pfyfferinstruggtere deerfe mitdrampe. Inzwiische het sich d Zaal vo de wyyblige Mitgliider erhööt. Do d Mitgliiderzaal vo de Dambuure uus verschiidene Gründ bis uff 4 gschrumpft isch, het me im Joor 2011 versuechswys am Morgestraich und Mittwuchoobe mit dr Rumpel Clique 1923 zämme gässlet.
Das het ab em Joor 2012 zenere Glygge- Partnerschafft gfiert. Drum macht me sythäär mit dr Rumpel Clique 1923 und de letschte Glieebiire mit em glyyche Sujet, vorläufig 2 Ladäärne und 2 Dambuurmaioore sowie aim Requisit zämme Fasnacht. Das het an dr Fasnacht 2014 e stattlige Zuug vo 66 Aggtive ergää. Am 20. Sebdämber 2013 het me zämme mit de Glygge-Partner im Saal vo dr Saffrezumpft zwai Juubilee gfyyrt. D Wettstai Clique Alti Garde isch 25 Joor und d Rumpel Clique 1923  isch 90 Joor alt woorde.








.

STEGGBRIEF

Mit eme Partnerschafts- Pin - entwigglet vom Dätt Marti -, eme Banggett und Juubel- Ball isch das Jubileeum entsprächend gwürdiget woorde.

Uus verschiidene Gründ sinn vom Stammverain nur sälte Lyt oobenaabe koo. Uff die Glygge- Partnerschafft isch Drugg entstande, wel d Rumpler altershalber allewyyl mee Aggtivi verloore hänn. Drum isch e groosse Dail vo dr Wettstai Alte Garde mit de andere Partner dr Mainig gsi, dass me dr Rumpel Clique 1923 zem 100-jeerige Jubileeum sott verhälffe. So hänn am 18.Juni 2020 an dr Generaalversammlig die stimmberächtigte Aggtivmitgliider meerhaitlig d Fusioon mit dr Rumpel Clique 1923 bschlosse. Somit hänn sii defacto dr Uusdritt uus dr Wettstai Alte Garde gää!
D Uffnaam vo däne Fusioonierer by dr Rumpel Clique 1923 isch an dr Daagig vom 05. Sebdämber 2020 vollzooge woorde.

In weller Form das Gfäss WAG in Zuekumpft wyter verwändet wiird, isch im Stammverain überlosse. Drum het dr Stamm an dr Fasnacht 2020 welle e Pilot-Versuech mit dr Neue Alte Garde (NAG) durefiere. S Süüschee het „Alt halt“ ghaisse. Dr Pilot hätt könne abheebe. Laider isch es nit zem Pilot koo, will d Corona Pandemie wäärend 2 Joor d Fasnacht uus-brämst het!
Soo sinn mr im 2020 e Stammglygge ooni NAG blyybe. Dr ainzig Hööephunggt, sinn die baide zaalte Nachtässe im Bruune Mutz gsi, wo mr für e zytli s letscht Mool zämme hänn könne gniesse.

Em 2022 het d Frau Fasnacht sich, allerdings ooni Cortège und laider au ooni Wäägeler, seer wild bemerggbar gmacht! Die Junge vom Stamm hänn kuurzfrischtig e Charivarizuug uff d Bai gstellt. Mr sinn mit roote draagbare Stiel underwägs gsi. Dr Pascal het em letschte Momänt no e Ladäärne aanebrocht, wo uus Virephünggtli s Bööse und s Guete dar-gstellt het!
Em 2023 und 2024 sinn mr denn mit de Süüschee „Alti wyssi Männer“ und „K(A)I Angscht“ wiider oordeli normaal uff d Gass!
An dr Lämbbesitzig 2024 hets in Sache NAG wiider Bewegig gää. Dr Thomas Brüderlin und Sandra Widmer hänn s The-ma wiider in s Gsprööch brocht.
Am 11. Abrille 2024 hänn denn die Baide gründlig über die neu dritt Wettstai Ainhait im Reschtaurant Leuezorn orien-tiert. Für d Nammensgääbig isch demoggratisch abgstimmt woorde. S Resultaat het ergää, dass mr wie anno 1988 jetzt wiider "Wettstai- Gniembbi" haisse.
Uff em Thomas Schürch sym Gründigsdoggumänt hänn alli Aawääsende unterschryybe:


















.
















Dr Thomas het dr Uffdraag gfasst e neus Gniembbi-Embleem ooni Hailigeschyyn zschaffe!