Mitdailige

Dr Willy isch am 28. Jänner 1948 uff d Wält koo und im Elterehuus am Rhy, in dr nööchi vo dr Vogel Gryff Fääri, im Glaibaasel uffgwaggse.

Die erschte Schritt in der Glygge muss är anfangs 90-ziger im Stamm versuecht haa. Är isch ämmel am „Morgestraich 1991 - by dr Fyyr 700-Joor Eidgenossenschaft“ in Brunnen und 1992 in der „Wettstai Festbaiz 600-Joor Glai- und Groossbaasel zämme“ derbyy gsi. Sy ganz groosse Wuurf het är 1995 als OK-Scheff vom Glygge Grümpeli glaischdet, wo under dr Regie vo dr Wettstai Clique duregfiert woorde isch.

Wo ych 2003 dr Willy in dr Alte Garde kenne gleert haa, isch är in dr Facilitybranche tätig gsi. Als Usslandschwiizer het är, zerscht im e Betrieb in Wuppertal und spööter in dr aigene Firma z Hamburg, sy Lääbensunterhalt verdient. Sy Lääbesmittelphunggt het är bis zletscht in Ham-
burg bhalte. Baasel und d Faasnacht het är mit sym Zwaitwoonsitz nit uss de Auge verloore.

Ze unsere gmainsame Zyt haa ych dr Willy als uffgstellte fröölige Mensch erlääbt. Dr Höhe-phunggt in sym Glyggelääbe sinn sicher syni 3 Joor Dambuurmajoor vo 2004-2006 woorde. Stolz het dr Willy als Bundesroot Couchepin, denn als HD Läppli oder als Selmeli Ratti sowie am Faasnachtsbummel 2006 - im zwaite Haimatoort Hägendorf - d Wettstai Clique Alti Garde aagfiert. Im Juli 2006 am Eidg. Pfyffer-und Dambuurefescht, het är au d Hypokras mit sym Stägge am Umzuug dur d Gasse gfiert. Als Wuurzegraaber isch är sälte bym e Kämmerli ewägg blyybe.

Laider isch es in de letschte Joor um e Willy rueiger woorde. Voor dr daasjeerige Marschiebig in dr G80 het dr Adrian dr Wettstaimarsch aagsait. Dä isch denn als Videobotschafft mit de beschte Wüntsch zer Besserig an Willy wyterglaidet woorde. Nooch ere lange schwääre Granggeszyt het dr Willy d Glygge am Frytig, 26. Abrille 2024 für allewyyl verloo.

Voorbemerggig dur dr Diggi Pfyffer; ych haa an dr Abdanggig im Seelehirt guet zuegloost. Em Richi sy Lääbenslauff umgschryybe und s Glyggeintäärne detaillierter derzue verfasst!

Dr Richi „Bobby“ Peyer isch am 17. Juni 1930 z Basel im Glaine Glingedaal geboore.

Im Ater vo 6 Joor isch är mi syni Eltere und sym Brueder an d Fäldbäärgstrooss - Egge Riechering umzooge. Am Aafang vom 2. Wältgrieg, het är als 9 jeerige Bueb d Mobilmachig hutnooch erlääbt. An dr Muba bym hüttige Musiggeltheater sinn d Soldaate in Aggtiyvdienscht yygruggt. Är het mitbikoo wie im Glaibasel d Infanterischte an de neuraligisch Phünngt d Stellige mit de Kanoone und Maschinegweer bezooge hänn.

1941 isch me wyter an Claragraabe in s Huus vo-nere Drogerie, em Ar-betsgääber vom Richi sym Bappe, zooge. Syni obligatorisch Schuelzyt het är im Glaibasel verbrocht. Statt eme 9.Schueljoor isch är in e Sproochuffenthalt, bym e Wyybuur in d Ajoie, zem s Schuelfranzöösch z verbessere. Wo är wiider zrugg uff Basel koo isch, het är by dr Danzas e kaufmännischi Lehr, verbunde mit em Kaa Vau, aagfange. Dr Monetsloon isch doomools zwanzig Frangge gsi und Ferie hets 2 Wuche gää. Dangg däm het är in de Danzas Filiale z Genua und z London könne die entspräächend Landessprooche verdiefe und aawän-de. Als mehrsprochige guet uusbildete Speditionsfachmaa isch är während synere brueflige Karriere by dr Danzas langi Joor in laitender Funggzioon d Südamerikaa am spediere gsi. Danzas isch bis zer Pensionierig sy Arbets-gääber blyybe.

Syni Elsbeth het dr Richi im e Gsangskoor kenne gleert und sich in sii verliebt. Zwai Joor druff, am 19. Sepdämber 1958, het d Elsbeth ihre «Bobby» uff em Standesamt ghyyroote. 66-zig Joor sinn sii ghyyrote gsi. Uus dr Ee isch, 1960-zig dur d Gebuurt vom Sohn Rolf und 1963 vo dr Dochter Yvonne, e Familie woorde. Dr Richi isch e Familiemensch gsi. Jeedes Joor isch är mit dr Familie südlig vo de Alpe in d Ferie. Zerscht in s Tessin und denn an s Mittelmeer. Spööter, wo Kinder flügge woorde sinn, het är mit syner Elsbeth Raise, no Südeuropa, in Oriänt, aaber voorallem uff Süd-amerikaa, unternoo. E bsunderi Freud und e änge Zämmehalt het är ze dr Änggeldochter kaa, wie dr Abschiidsgruess vo ihre, by dr Abdangig an Groossbappe, zaigt het.

Bivoor ghyyroote woorde isch, het ihn s Faasnachtsfieber phaggt. 1956 isch dr Richi als Dambuur in d Wettstai yydrätte. Är isch e sehr e aggtive Wettstainlemer gsi. Dangg sym groosse Angaschment isch är bym Stamm Eeremitgliid woorde. Wo die Junge vo 1952 elter woorde sinn, hänn fümpf am 4. Oggdoober 1988 an ere Sitzig im Rhyfäälderhoof entschiide, d Faasnacht under em Namme «Gniembbi» gmietliger aazgoo. Dr Richi isch denn, zämme mit em Hanspeter Börlin, Oski Refer, Wolfgang Schurter und René von Schallen, in dr Gniembii Dambuuregrubbe an dr Fasnacht 1989 au yygstande. 1991 isch dr Richi zem Oobmaa vo de Wettstai Gniembbi gwäält woorde. Daas Amt het är seer gwüssehafft, aber au speditiv uusgiebt. Dr Richi isch au e groossartige Väärslibrinsler gsi. Är het jeedi Gläägehait gnutzt, eb bym La-däärneväärslibrinzleroobe oder an dr Gee Vau, eppis in gryymter Form voorzdraage. Wäärend 10 Joor isch är de Wettstai Gniembbi, wo sich in synere Amtszyt in d Wettstai Alti Garde umgwandlet het, voorgstande. Am 12. Mai 2001 isch är zruggdrätte und an däre Generaalversammlig aistimmig zem Eereobmaa gwäält woorde. Do derzue ghöört syni persöönlig Zämmefassig in Väärsform, vo syne 10 Joor als Wettstai Gniembbi und Alt Garde Obmaa:

1991/92 Im erschte Joor han y scho my liebi Noot
denn an dr Fasnacht gsehn d Gniembbi root!
Am Cortège han y grad achtzäh Aggtivi zellt
dr Niggi het sich als Dambuurmajoor zuen is gsellt.
Dr Bummel het ys ins Fyyrwehrmuseum gfiehrt
und d Kasse het 2'300 Stutz Subvenzioon addiert.
Voorhär hänn mr no dr Jögge als Regierigsroot gfyhrt
und im Summer s erscht Mool uff die Aigeni Scholle gstyrt.
Dr René (von Schallen) hoggt lieber hinder eme Humbbe,
als nääbe em Jack mit eme stinggige Stumpe!

1992/93 Im Goschdyym gseht me is am erschte Ständeli stoo,
denn sinn au die erschte Gniembbi-Räppli uusekoo.
Au het me grad 500 Joor Grooss-und Glaibasel zämme gschryybe
und mir hänn zämme mit em Stamm e Baiz betryybe.
Im Herbscht sinn mr ins Emmedaal, dr Himmel het deert grunne
und an dr Faasnacht hänn 19 Gniembbi am Cortège gspunne,
derzue het dr Drummel- Jürg e scheene Pin kreiert.
Und am Bummel hett ys s Waldeburgeki noo Daalhuus entfiehrt.
Dr Niggi maint, är syg dehaim am Glingedaalgraabe,
und scho dropfts by ihm in dr Utegass voorne aabe

1993/94 20 Joor Gwaffeer: Mr hänn im Beat e Ständeli brocht an dr Schanzestrooss,
drno sinn mr im Herbscht vom Rhyfall, dr Rhy ab uff Waidlig und Flooss.
Im Novämber hänn denn d Gniembbi ooni Pämpers deerfe umme renne,
sii sinn fümpf Joor alt woorde und hänn d Stammdischlambbe yyweie kenne.
An dr Faasnacht hänn scho 24 Gniembbi im Heer Sarasi hälffe zigle,
wie allewyyl duet au daas Joor unser Bethly s Gniembbi- Zigli bigle.
Zem Jooresabschluss driffsch denn dä Faasnachtshuffe
Zmitts im Rääbbäärg z Auggen unde bym Markgräfler suffe.
       Noonem Gebuurtsdaagsapéro kunnt unsere Obmaa ins Wangge,
       denn dr Proschek verlangt fir zwai Orangsche 45 Frangge.

1994/95 S Joor vo de Gebuurtsdaagsfeschter hänn mr denn erläbt,
           nit weniger als säggs Gniembbi sinn im e Runde zuegsträbt.
           Reimaa, Schurter und Wyss zämme uff dr Schollen im Mai,
                        speeter dr Refer Oski, dr Hürlimaa mit em Ramstai.
440 Joor J.R. Wettstai: Beglaidet hänn mir in s Casino d Prominänz.
Am Herbschtbummel denn Fähri, Schiessbuude und Striptyysdänz.
An dr Faasnacht hänn d Gniembbi e Yyszyt im Altershaim erläbt
       und am Bummel sinn sii im Rääge no Sissach gsträbt.
                     Zem erschte Mool hänn unser Ladäärnegstell
                fachmännisch zooge unseri baide Meier im Duell

1995/96 Zerscht hänn mr dr Jögge gfyyrt als Regierigsrootsbresidänt.
Am Glyggegrimpeli denn grampft uff em Sandgruebegländ.
Villa Wettstai het unseri Baiz ghaisse am Wettstaibruggefescht,
bewirdet hänn mr deert aaberduusig vo Feschtbsuechergescht.
Zem erscht Mool hänn mr im Rhyhaafe unde Lauffe glehrt
und an dr Vernissage het is dr Megge mit syner erschte Ladäärne gehrt.
Als Kneippy sinn d Gniembbi denn uff e Cortège go wandere
dr Bummel het is no Bürgle gfiehrt und zem Ässe no Kandere.
              Stämpfeli, maag e Hämpfeli -
              an dr Bar, dasch jo glaar -
              mien sii lyyde, blaich wie Gryyde.

1996/97 Zem Ufftaggt hänn mr dr Stamm in d Mägd verschoobe,
denn hänn mr 75 Joor Bethly gfyyrt im Maie am e scheene Oobe.
Im Herbscht sinn mr in s Elsass go e Buurehoof bschaue
und aaschliessend in s Santihans, wo sii Modällyysebahne baue.
An dr Faasnacht hänn d Gniembbi, wie kennts au syy, en Idee
und am Cortège kasch jetzt scho 26-zig Gniembbi gsee.
S Heidi Renz het iis zem erschte Mool unseri Goschdyym gnaiht
und dr Bummel hets is ibere Jura no St. Urban draiht.
              D Subvenzioon isch mit 2'500 Stutz by mene Hoor
              glyych hoch uusgfalle, wie em erschte Joor.

1997/98 Als erschts isch dr Willy Hunkeler 60-zig woorde,
          daas het är gfyyrt zämme mit dr Gniembbi Hoorde.
         Im Herbscht ischs mit vyyl Durscht no Muttenz gange
und voor dr Wiehnacht hänn sich Dreikeenig ghebbt an de Stange
      Zem erschte Mool dien mr im Schuelhuus Väärsli brinsle
   und an dr Faasnacht bym Comité, wo duet spaare, wimsle.
Am Bummel sinn d Gniembbi vo Magde zem Wooghoof gstyyrt
              und an dr Gee Vau hänn mr 10 Joor Gniembbi gfyyrt!
D Pfyffer mien jeedes Joor, dass es an de Marschiebige besser duet glinge,
            zerscht bym Pavarotti z Neapel unde go lehre s Schreiholz lo singe!

1998/99 Im Herbscht sinn mir no Seewe ze de Muusiggautomaate,
     denn hänn is d Mägdbaizer zemene Oggddoberfescht yyglaade.
         Voor dr Wiehnacht fyyre mr no 280-zig Joor Haberthür, Heer,
            Erni, Beat Meier und Wyss by Fondue, nit uus Camembert.
                 S Väärslibrinsle entwigglet sich zemene gmietlige Oobe,
will Basel schlooft, gsehsch is am Cortège in dr entsprächende Roobe.
Dr Bummel fiehrt is denn ins Elsaas noo Riquewihr,
zem Gligg isch s Dringge denn deert nit eso dyyr!
     Hoffentlig waiss dr Wolfgang, wenn är uff s WC muess verschwinde,
     im Gegesatz zer Ladäärne, was by ihm voorne isch und was hinde.

1999/2000 Im Summer het is dr Niggi yyglaade und uff e Waidlig ghoolt,
im Herbscht hänn mir d Gee Vau vom Behindertesport muusggkalisch untermoolt.
             Druff aabe het d Mägd wiider e Oggdooberfescht aabotte.
                am Herbschtbummel het sich, denn e Gniembbi-Rotte
                       dur Bier und Spiilzyyg noo Bettige uffe bewegt.
   An dr Faasnacht hänn sich d Gniembbi uff d Playa Gwäggi gleggt.
      Denn sinn mr am Bummel in dr Lange in s Bumpwäärgg aabe
   und an dr Gee Vau hänn mr unsere Namme Gniembbi begraabe!!!
              Amene Mäntig fählt unsere Cooprofit- Pfyffer, s isch zwoor doof,
              wenn är Stäpfelikappe aa het, fallt är amigs in e diefe Schloof.

2000/01 Am Dambuurefescht hälffe mr im Stamm in ere Baiz grefftig schaffe,
    denn fyyre mr 70-zig Joor Heinz, Richi und Niggi by de Kieh, wo bleed gaffe.
                   Drum goot die Alti Garde im Herbscht in s Laguna go baade
             und im Dezämber fyyrt dr Hansjörg mit 60-zig in dr Mägd e Graade.
               Am Cortège dien mr mit 39 Aggtive d Deppe vom Erzdep versoole
und am Bummel d Faasnacht, will sii so scheen gsi isch, z Binnige wiiderhoole.
         Syt dr Grindig sinn mir an dr Faasnacht jewyyle im 7. Himmel gschwäbt,
            was mi bsunders frait, mir als Alti Garde hänn die Zyt iiberläbt.
                      Merci fir Eyri Understitzig bym Fiere vom Glyggeschiff!
                      Ych wintsch im neie Voorstand, au är haigs allewyyl im Griff.

Dr Richi isch nooch em Ruggdritt als Obmaa no wyter aggtiv in dr Druummelgrubbe yygstande und het mitgruesst. 2009 het är bassend zem Sujet «Ciao Bruno» (in Aaspiilig uff d Schliessig vom Bruune Mutz dur e Alfred Rhikoff) au ciao gsait!
Dr Richi isch aaber dr Glygge als Passivmitgliid dreu blyybe. Noo e baar Joor het är an dr Gee Vau als Daagesbresidänt d Wahlgschäfft übernoo. Bis zletscht Joor isch är allewyyl mit dr Elsbeth an d Summerstämm und an d Ladäärnevernissage koo.

Richi Du hesch e groosse Milestai in dr Wettstai Clique gsetzt. Mr wäärde die frööligi und luschtigi Zyt , wo mir die vyyle Joor hänn döörfe mit Diir verbringe, vermisse und scho gar nit vergässe. Mir bhalte dii mit dym Abschiidsgruess, wo Du noodyyrlig sälber als Väärsli feschtghalte hesch, in Eere. Hebs guet uff dr Faasnachts- Himmelswolgge!