Fasnacht 2023

Wettstai Gniembbi Fasnachtsbricht 2026
Nooch däre verschiffte Voorfasnachtswuche, hets dr Petrus am Morgestraich gnädig mit is gmaint und dr Haane abgstellt.

Am Mäntig sinn mr wie allewyyl an dr Yysegass mit alle drei Ainhaite yygstande. Mit em letschte Schlaag vom Martinskirchli het e anderi Stimm im Giraff uff d Seggunde dr «Morgestraich» aagsait! Daas Joor het dr Sebastian - alias Sebbi - mit em Adi s Morgestraich Goschdyym gwäggslet, Dr Adi het uus gsundhaitlige Gründ sy Amt miesse wytergää. No zwai gmainsaame Umgäng sinn mr ellai wyter zooge.
Bym Bruune Mutz hänn mr is wiider mit em Stamm droffe. Vo döört sinn mr, scho bald dratizioonel, zum Hotel Radisson s Zmoorge mit dr feine Uuswaal go gniesse. Dr harti Käärn het wie allewyyl dr Morgestraich seer lang uusglääbt.

Am Noomidaag voor em Cortège hänn mr is im Rhyfälderhoof droffe. Am Claragraabe isch mr denn in die usseri Route, Richtig Comité, zum Wettstaiblatz yygfäädlet.

Unser Sujet het «d Schyssi isch am Dampfe» ghaisse. Drmit isch Gschicht vo dr Basler Miss(scht)wirtschafft mit de Fäälblaanige und Meekoschte an alle Egge gmaint! S eewig Määrli vom ryyche Basel, wo im Gäld schwimmt und s kai Änd nimmt. Woorschyynlig goots doch nümm so lang, bis kai Zaschter me do isch?
D Voordrääbler sinn als Bolitigger und Bolitggerinne ummegloffe, wo ganz logger und lyychtfeertig unseri Staats-kasse missbruuche! Bym verdaile vo unsre Stüürgälder, sogar noo im Volgg die langi Naase uusegstregge.
Uff dr Ladäärne het me allerhand Miss(scht)wirtschafft zsee bikoo. E geniaali Ladäärne, wo uff dr Voordersyte dr Kopf und uff dr Hindersyte s Füüdle mit em Schwanz vom Goldeesel uusegluegt het.
D Pfyffer hänn daas Joor am Cortège voor em Reggwisyt, als Grupfti Hiener miesse yystoo. Statt em Güggel, het dr Plaitegaier se ghiedet.
S Reggwisyt het dr Mischthuffe am Dampfe dargstellt. Uff eme Bürostuel hoggend, isch dr Gröösse dirigierend ummezooge woorde.
Dr Dambuurmajoor isch dr Basler Goldeesel gsi. Är isch langsam, aaber sicher, als wie diefer, im Mischt ver-sungge.
D Dambuure sinn au grupfti Hiener gsi, zwar ooni Güggel, aaber mit Aier. Ych hoff de hesch s Süüschee verstande. Suscht ka dr Zeedel lääse hälffe.

Dr 1. Halt hets bym Adler gä. Döört hänn mr dr draabend Stamm vo dr Spale Clique mit de Stäggerössli gnosse. Dr 2. Halt isch nooch dr Bruggeüberquerig im Gifthüttli gsi. Derno ischs wyter gange zur Seibi mit em 3. Halt bym Bruune Mutz. Uff die Siibeni isch in dr Staine zum e Apéro im 1. Stogg vom Club59 reserviert gsi. Dangg däm längere gnoorzige und stimmigsloose Halt, hänn mr de ainzige Räägedropfe an däre Fasnacht könne uuswyyche.
Uff die achti Zoobe sinn mr im 1. Stogg vom Bruune Mutz zämme mit em Stamm go Znacht ässe. S Servicpersonaal isch wie em Voorjoor s Glyyche gsi. Es isch e aifachs Menue (Höörnli mit Ghaggts) rasch, gnueg, guet und warm uffdischt woorde.
Dernoo isch me noonemool uff d Gass. D Gniembbi hänn denn um die zwölfi Znacht d Inschtrumänt verstumme losse.

Am Zyschtig sinn d Wettstai Schyssdräggzüügli underwäggs gsi. Am elfi Zoobe het me sich freiwillig zum groosse Umgang voor em Stadtkäller droffe. Bym Bruune Mutz hänn d Hintermanne dr Abgang franzöösisch gno!

Am Mittwuch het is dr Glyggehoof-Fotigraph Thomas wiider voor d Linse ghoolt. An dr Yysegaas hänn sich die drei Ainhaite separaat abliechte losse. Phünggtlig am halber Zwai sinn mr uff dr innere Route abmarschiert. Uff dr Brugg sinn mr die längscht Zyt im Stau, an dr zue warme Sunne, gstande. No dr Brugg het dr Zuugsscheff sich entschiide d Abküürzig dur d Utegass z nää. Bym Brunne an dr Riechedoorstrooss het dr Goldeesel zum 1. Halt abgwungge. E baar Dambuure hänn uff dr Fänschterbangg vom Doorstüübli s Bier und d Sunne gnosse.
Aaschliessend sinn mr bym Brunne wiider yygstande und in Cortège yygfäädlet. Uff dr Wettstaibrugg isch me meer gstande, als gloffe! Daas het derzue gfiert, dass bym näggschte Stau is, hinder de Zueschauer im Gänselimarsch, d Voogelschüüchene und Graaie vom Stamm überhoolt hänn. Oobe an dr Brugg sinn mr uusgfäädlet und via Rittergass bis zum 2. Halt an d Bäumligass gloffe. Im und um s Rubino hänn mr is verpfläägt.
Wiider yygfäädlet het die näggscht Routeabküürzig im Brunngässli hinder de Ammedysli scho wiider zum e Stillstand gfiert. Ändlig sinn mr in d Aeschevoorstadt yybooge und Richtig Stainebäärg wiider uff dr Route gsi. Statt hinder de Ammedysli dr Stainebäärg ab z blyybe, zum an de vyyle Zueschauer – im Groossbasel könne d Lüt no d Zeedel uff Baseldütsch lääse - und am 3. Comité verbyy z goo, isch me in die leeri Freie abbooge. Schaad aigentlig.
Am säggsi Zoobe isch im 1. Stogg vom Bruune Mutz s Nachtässe uffdischt woorde. Daasmool isch kai Epfelmuess mit Höörnli und Ghaggtem serviert woorde. S het e feyne Häärdöpfelstogg mit Broote und Gmies gää.
No em Znacht sinn mr mit alle drei Ainhaite d Pharadestreggi ab zum Stadtkäller gloffe. Vo döört ischs wiider zrugg an Seibi, um noochhär dr Koolebäärg z bestyyge. Via Heubäärg ischs zur Harmonie gange. Dr «long way» via Noodlebäärg, Petersgass, Bluemerain, Spiegelgass, Stadthuusgass an d Schnyydergass het ooni d Gniembbi stattgfunde.
Dr Zuugsscheff het is denn no uff Umwäägli und Zuesatzrundene zum Stammhuus an d Määrtgass brocht.. Voor und im Stadtkäller isch ainiges loos gsi. Noochenand hänn zerscht d Knorzi, gege die 01.00h drno d Gniembbi und am 04.00h dr Stamm mit em Wettstaimarsch zum Ändstraich bloose.
Dangge Frau Fasnacht und kumm wiider am 15. Hornig 2027.
Mr freue is uff 75-zig Joor Wettstai Clique 1952.
Digge Pfyffer