Fasnacht 2025

Wettstai Gniembbi Fasnachtsbricht 2025 Nr. 01
Jä nu, do die längscht Zyt, sich uff e Whats App Uffrueff vo dr WB Redaggzioon niemerts gmäldet het, zum e Wettstai Gniembbi Fasnachtsbricht zschryybe, versuech ychs! Noochdäms fümpf Joor kai Alti Garde me gää het, erlaub ych mir dä zverfasse, aaber e weeneli kritisch!!!
Am Mäntig sinn mr wie allewyyl an dr Yysegass – ändlig wiider mit alle drei Ainhaite, Knorzi, Stamm und Gniembbi – yygstande. Mit em letschte Schlaag vom Martinskirchli het dr Adi sekundegenau dr „Morgestraich voorwärts Marsch“ aagsait! No zwai gmainsaame Umgäng sinn mr ellai, aaber nit verlasse unterwägs gsi. Drotz e baar Granggetsuusfäll by de Pfyffer, hänn sogar d Dambuure gloobt, dass es guet döönt haig. S Zmoorge mit ere groosse Uuswaal hänn mr wiider im Hotel Radison gnosse. Drotz em Rääge het dr harti Käärn dr Morgestraich seer lang uusglääbt.
Am Nomidaag voor em Cortège isch me sich no im Käller by dr VKB Alti Garde go verköschtige. Denn isch me am Claragraabe in die usseri Route vom Cortège Richtig Wettstaiblatz yygfädlet.
Unser Sujet het „Hools dr Gugger - mir sueche Schugger“ ghaisse. S isch vom e ghaimnisvolle Väärslibrünsler als Druurspiil in vier Äggt uff e Zeedel druggt und dur e Voordraab verdailt woorde.
Dr Voordraab isch als Staatsdiener in blauer Uniform mit em alte Güpfihelm unterwägs gsi. Uff däm Helm und an de Jagge vom ganze Spiil, isch s neue Gniembbi-Signet aabrocht gsi.
Dr goossartig Dambuurmajoor isch als Juschtizdiräggtere Stephanie Eymaa uff eme Junterössli gritte und het im Spiil dr Thaggt aagää.
S Spiil het in seer häälgriene Jagge mit bruune Hoose und wysse Sogge als Jeeger, wo Schugger sueche, dr Zuug dominiert. An de uff alte Larve montierte Fääldstächer, wo uff em Broobe-fasnächtler Florian sym 3D-Drugger entstande sinn, het mes aagsee, dass do wirgligg Personaal gsuecht wiird.
Dr bescht Uusbligg zum sueche het dr Schlutti uff em Hochsitz oobe vom Reggwisyt kaa. Är het sicher e Huffe z verzelle, über daas wo är alles duur sy Fääldstäächer gsee het.
Die erschti Wettstai Gniembbi Ladäärne vo dr Neuzyt isch mit iirer Dreieggsform scho e weeneli gwöönigsbedürftig gsi. Dur die relativ glaine Dreieggsfläche het sich dr Kinschtler in vyyle glaine Detail verloore. D Voorder- und Ruggsytene hänn laider, dur dä underbrächendi Absatz in dr Mitti vo dr Ladäärne, an Groossflächigkait und -zügigkait yybiesst. No eppis Wichtigs, waas mr für e Süüschee hänn und wie mr haisse, hesch au nit uff e erschte Bligg uusegfunde!
Im Dyychgässli hets, nooch dr Passage bym Comité an dr Clarastrooss, dr 1. Halt gää. Dr 2. Halt isch nooch dr Bruggeüberquerig scho bym Stadtkäller gsi. Drno hets e lange Marsch am Comité bym Stainebäärg verbyy, in d Aeschevoorstadt gää. Döört hann mr im Käller vo «De Versoffene Dööcht» e längere 3. Halt, mit feyner Zwüsche-verpfläägig, gmacht.
Uff die achti Zoobe sinn mr im 1. Stogg vom Bruune Mutz zämme mit em Stamm go Znacht ässe. Do gits e groosses Danggerscheen an s Baizesuech-OK zrichte. Es isch richtig gsi, dass me mit em Wirt greedet und dr Standort byybhalte het. Dr Service isch gege em Voorjoor, wie Daag und Nacht gsi. Es isch e aifachs Menue rasch, gnueg, guet und warm uffdischt woorde.
Dernoo isch me noonemool uff d Gass. D Gniembbi hänn denn voor Mitternacht uffghöört.
Am Zyschtig sinn d Wettstai Schysdräggzüügli, wie Popeye, Yysbääre, Zääni Club, Blaui Garde, die Schyytere und Saitespränger, underwäggs gsi. Am elfi Zoobe het me sich freiwillig zum groosse Umgang voor em Stadtkäller droffe. Laider isch dä gruusig verschifft woorde. Drum het dr grooss Huffe bym Bruune Mutz dr Abgang franzöösisch und dropfend gnoo!
Am Mittwuch het wiider die groossi Stund vom Glyggehoof-Fotigraph Thomas gschlaage. An dr Yysegaas hänn sich die drei Ainhaite separaat abliechte losse. Phünggtlig am halber Zwai sinn mr uff dr innere Route über d Brugg abmarschiert. Am Claragraabe het dr Gröösse bym Comité sy gliebte Maieriislimaie griegt, wo mee im Ladäärnegraabe, als in sym Arm glääge isch. Dr 1. Halt het bym Brunne an dr Kirchgass stattgfunde. Aaschliessend het me am Wettstaiblatz wiider in Cortège yygfäädlet. Am Comité verbyy isch me oobe an dr Brugg uusgfäädlet und via Rittergass bis zum 2. Halt an d Bäumligass gloffe. Voor em hefftige Rääge hänn mr is u.a. ins ehemoolig Lufftschloss, wo jetzt Rubino haisst, gflüchdet. Dr Zuugsscheff het is denn ab dr innere uff sy aigeni Route in d nööchi vom Seibi gfiert! Döört wär mit de Amedysli dr Apéro voorgsee gsi. Do ab dr Aesche bis zem Seibi e gröössere Gotthard-Ooschterstau gsi isch, hänn die Maischte dr Apéro verbasst. D Amedysli sinn erscht im zwaite Aalauff uff e Baarfiesserblatz yynekoo!
Am säggsi Zoobe isch im 1. Stogg vom Mutz s Nachtässe uffdischt woorde. Daasmool isch kai Epfelmuess mit Höörnli und Ghaggtem serviert woorde. Für d Nit-Vegianer hets e feyne Häärd-epfelstogg mit Broote und Gmies gää. D Knorzi sinn denn no zem offerierte Dessert yydroffe. Dr Service isch, wie scho am Mäntig erwäänt, seer kundefründlig und züügig gsi.
D Ladäärnezier hänn unser lyytchend Dreiegg vo dr Wysse Gass zem Dramhüüsli voorzooge. Daas het zum e Duurenand und ze Abmarschverzöögerige gfiert, will:
a) dr Stamm und d Knorzi iiri Ladäärne, wie allewyyl uff em Barfiesserblatz abgstellt hänn.
b) do sich d Zuugsscheffe nit abgsprooche kaa hänn, dass mr zwai Runde zämme mache, hänn die baide Lambbe ze dääre vo de Gniembbi voor e Mutz miesse ghoolt wäärde.
c) wo denn die Herre Zuugsscheffe sich mit dr Stammzuugsscheffin gainigt hänn, isch me denn ändlig zämme, mit drei Lambbe dr Koolebäärg uff über e Oobere Heubäärg zur Harmonie gloffe.
Nooch em längere Halt in und um d Harmonie, isch dr «long way», via Noodlebäärg, Petersgass, Bluemerain, Spiegelgass, Stadthuusgass an d Schnyydergass, draa koo. Voor em Stadtkäller, isch um die Elfi Zyt für dr Ändstraich vo de Knorzi gsi. Zwai Stund spööter hänn au d Gniembbi d Ladäärne mit em Wettstaimarsch verabschiidet. Dr Stamm het no e baar Umgäng under d Fiess gnoo, bivoor dr Adi e letschts Mool sy Wääse uff sym Schyyterhuffe gwäggslet het. Mit dr Daagwach und em Wettstaimarsch isch die grandioos Ladäärne vom Pascal am Ändstraich verabschiidet woorde.
All Joor sait me zem Abschiid, es isch e «schööni Fasnacht» gsi. Als Gniembbi isch für mii daas Joor d Frau Fasnacht, no glunge und ungegoore uff mii zuekoo.                                                                          dr Diggi Pfyyfer

Wettstai Gniembbi Fasnachtsbricht 2025 Nr. 02
Ych muess zuegääh, ass das Johr bi mir perseenlig an dr Fasnacht nid alles esoo gloffe isch, wie sunscht. Aigentlig bi ych am Cortège überhaupt nid gloffe, sondern rächt gmietlig im Hochsitz vo de Gniembbi gsässe. S Schiggsal het mr definitiv zaigt, ass ych halt als "Alte Sagg" definitiv in die Alt Garde gheer.
Uff em Hochsitz z hogge und das Fasnachtsdryybe vo oobe aazluege isch ganz interessant gsi. Was me do nit alles seeht ...
... Zerscht emol seen ych numme s Güpfi vo dr Larve, will ych - wie allewyyl - my Larve wiider emool nid aabrobiert ha. Aber ych ha jo no gnueg Zyt bis zem näggschte Halt und tatsächlig seehn ych denn bald au besser uuse ...
... woby, das wo-n-y seeh, ych lieber nit aalueg! Es isch e unfiltrierte Bligg uf dr Gniembbi- Vordraab; en Ächze, e Hingge und e Schluurfe, ass ych bald emool dängg, do gits dr Aint und die Ander, wo lieber statt mir uff em Hpochsitz set hogge. Bym näggschte Halt hany denn dääne Kandidaate s Aagebott zem Rollewäggsel gmacht, drby aber numme s blange Entsetze gspyyrt: "Was? Ych sell uf das Gstell uffe klättere? Spinnsch aigentlig?"
Es bruucht wie allewyyl in mym Lääbe e Weeneli, bis ych mi an e neji Situazioon gweehnt ha, aber denn bini umso resischtänter! "Ych has brobiert", hany dänggt, aber jetzt wird dä Sitz in luftigr Höchi mit aller Vehemänz verdaidigt. Dr Zugschef hany bätte, ych möcht am Änd vom Zug zooge wärde. Nid lutt hany gsait: "drmit ych das Eländ im Vordraab nid immer muess aaluege!"
No am Mäntig hanys denn gschafft - mit Larve - e Orange vomene Waggiswaage zfange. Ych glaub, s erscht Mool in mynere ganze Fasnachtskarriere hany au emol e anderi Glygge (und erscht no vo oobe) gseeh und es git an some Cortège ganz e Huffe z gseeh. Sogar dr aige Stamm isch duuregloffe ych muess gestooh, e bitz wehmietig het mi dä Aabligg scho gmacht.
Denn hany mi dr soziale Integrazioon gwidmet. Ych ha jo lang gnueg am Kölner Karneval könne em Prinz zue und drbyy ebitz öppis abluege. Ych ha also, als Linggshänder, elegant mit em lingge Pföötli, ins Bublikum gwungge. Vorallem die hold Daamewält het zrugg gwungge. Mag jo syy, ass au Männer zrugg gwungge hänn, aber döört hany halt nid so gnau aanegluegt, Immerhi hany s denn sogar bis zer Regierigsröötene brocht. Aber wirgligg schwäär isch das nid gsi. Schwäärer isch dä Momänt gsi, wo dr Zugschef vor em Ässe mitdailt het, ass s Reggwisyt jetzt in s Schuelhuus goot. Wenn ych dr Schloofsagg drbyy gha hät, wär ych glaub mitgfaare. Vom Kulinarische här, hätt im Verglyych zum Glygge- Nachtässe vermuetlig jeede Pizzakurier s Renne gmacht.
Mir het die Hochsitz- Fasnacht esoo guet gfalle, ass ych d Sujetkommission drum bitt, für die näggscht Fasnacht wiider e Reggwisyt mit Höheblig in Zug yyzbaue. Em Kassier sag ych in däm Zämmehang: "Ych würd au e Batze für d Reggwisytezieeher byystüüre".
Zämmegfasst han ych für mi s perseenlig Motto vo dr Fasnacht gfunde: "Hesch emol dr Überbligg - findsch sogar dr Cortège digg!" Bis zer näggscht luftige Fasnacht griesst dr                                                               Schlutti