Alli wo maine sich "z alt halt“ füüle, um im Stamm no mitzmache, sinn ze-nere Sitzig am 11. Abrille 2024 im Drummel- und Fächtsaal im 2. Stogg vom Reschtaurant Leuezorn yyglaade woorde. D Fäderfierig für e altersgerächts Glyggekonstruggt z schaffe, hänn dr Thomas Brüderlin und d Sandra Widmer übernoo. Dr Thomas, assischtiert vo dr Sandra, isch Phunggt für Phunggt dure gange.
S Ergäbnis isch, dass no fümpf Fasnachte Underbruch, die dritti Wettstai-Ainhait mit em uursprünglige Namme vo anno 1988 „Wettstai Gniembbi“ wiider ab 2025 uff d Gass goot! (s.h. au s Brotokoll under Intärn zfinde)
Drmit dä Bschluss no rächtskräfftig wiird, muess bis zer Generaalversammlig s Reglementarische (wär, wie und was sinn mr) und s Finanzielle (Budget für d Fasnacht 2025) erschaffe wäärde. An dr Blausch-GV 24 vom Samschtig, 08. Juni het denn d Glygge abschliessend z befinde. Für s neue Emblem z schaffe, het dr Thomas Schürch mit Freud e Uffdraag entgege gnoo.
Do no d Foti vom Toni Lämmle.
Gründigsversammlig Wettstai Gniembbi
< < s Foti zem vergröössere und wyter blettere aagligge
Blausch- Generaalversammlig Die isch am Samschtig, 08. Juni 2024 under em Motto «Mer heebe ab» vom Schneider- Clan organisiert woorde. Droffe het me sich bym «The Pub» an dr Clarastrooss 56 am halberzwai am Nomidaag. Was do alles an Phantasie um-gsetzt woorde isch, het e groossi Spränggraft kaa, will die Maischte e Rageete uff em Rugge kaa hänn. Es het zimmlig ächti Aschtronaute derbyy kaa, wo mit eme vollständige Ruumaazuug mit em Gniemmbi-Mobil uff em Rugge hänn welle abheebe. Häärzigi Elfe sinn aanegfladeret. Au Touris hänn mit iire Roll-koffere Richtig Male welle abfliege. No neuzytligi Kampfjetpilote, aaber au alti Spitfirepilote mit iire unverkenbare Kopfbedeggig sinn yygflooge. By Ainige wo Jasskaartelyybli und -Kittel aakaa hänn, hesch zerscht miesse druff koo, dass me bym Jasse oder Skat au abheebt. Denn ischs lut woorde, will zer Muusigg vo de «Led Zeppelin» e Zeppelin aagflooge isch. Glyychzytig sinn, wie wenn sii als Pasaschier zem Zeppelin uusgstyyge wäre, e baar gräälrooti Beerügge mit Tütü und vyyle silbrige Stäärnli uff dr Hut d «Spice Girls» uffdaucht. Die hänn woorschyynlig Stäärnschnubbe dargstellt oder so! Noodäm me sich begriesst und s erschte Gedrängg gnosse het, ischs wyter gange. Under dr Fierig vom Zeppelin het sich e Fluugzüügli bildet. Daas isch denn bym Liftyygang zer Bar Rouge vom Mässeduurm glandet. Do isch no dr uffblooseni waggelegi Maa im Mond uffgfalle, aaber au är hets drotz aller Aa-strängig nit gschafft in ooberschte Stogg zfliege. Döört het im e Seminarruum d GV under dr Laitig vom Matthias Keller stattgfunde. E Novum oder s aigentlige Highlihgt het sich in zwai Phünngt bym Draggtandum 7. vo de Waale zaigt. Zerscht het me s erscht Mool für die dritti Ainhait - de Wettstai Gniembbi Alti Garde - e Ooobmaa in dr Persoon vom Thomas Brüderlin aistimmig mit synere Enthaltig gwäält. By dr Waal zem 2. Byysitzer in Wettstai Voorstand isch es zenere Kampfwaal koo. Die het dr Schnitzge gege e Zögge mit groosser Bravour gwunne. Wie alli Draggtande abghandlet woorde sinn, kaa me denn im vo dr Lia no ze verfassende Brotokoll entnää. Nooch dr GV hänn sich drei Grubbe uff verschiideni Arte in s Groossbasel verschoobe. E Dail hänn im Stadtkäller e Zwüschehalt gmacht, um denn bym Spiegelhoof dr 33-iger Bus Richtig Schönebuech znää. Im Letten z Allschwill isch me uusgstyyge und zem Lokaal vo de Dief-Flieger gfiert woorde. Die hänn zerscht zem Apéro mit neue Stüggli vo iire 15-te Schyy-be uffgspiilt. Derno hänn Bändmitgliider, wo gits daas suscht no, dr Salat und dr Hauptgang serviert. Bivoor d Boscht mit de bikannte Songs abgange isch, hänn sii no uff Wuntsch vom Schnitzge, versuecht e Dail vom Led Zeppelin aazspiile. Usser em Waeppi isch e stargg verjüngti Band uffdrätte. Do isch e neue grooss-artige muusigkalische Wind dinne gsi. Es het gfägt. Unglaublig wie die iiri In-schtrumänt im Griff und uusgraizt hänn, fascht wie mir unseri in dr Wettstai. Mit X-Zuegoobe isch dä Blausch-GV Oobe uusglunge. Sicher hänn no e baar e Halt oder zwai im Glaibasel für e Schlummerdrungg gmacht. Dr Melina, em Fätze und em Schnitzge e groosses Danggerscheen für d Or-ganisazioon vo däre Blausch GV. Sisch super gsi. Digge Pfyffer
Dr 1. Summerstamm 2024 het dr Dreesi organisiert und an Züüghuusstrooss zer Besichtigung vom neue zwaite Sanideet-Rettigsstützphunggt yyglaade. An dr Nordfassade, gegeüber de baide Yygangsdoor mit dr Baanlinie und dr Autibaan uff Basel, sinn im Parterre uff dr ganze Fassadelängi und Gschoss-hööchi verglaasti Falttüre montiert. Döört drvoor isch dr Dräffphunggt gsi. Uff aimool isch e Falttüre uff-, aaber grad wider zuegange. Schlussändlig isch no eme wytere Versuech dr Dreesi is go in Empfang nää. No e baar Woort zer Bergriessig in dr riisige Faarzüüghalle, het är uns dr Marc Renggli voorgstellt. Unschwer het me ghöört, dass är kai Baasler isch. Är kunnt uus em Luzäärnerhinderland vo Willisau. Dä Oort wo die harte Ringli entstöön und Zaanärzt an de abbrochene Zeen, sich denn gsund verdiene! Will im Herbscht und Winter über em Mittelland e diggi Nääbeldeggi d Sunne verdeggt, het är bewusst im sunnige Basel an dr Uni sy Studium absolviert. Die Stadt het em so guet gfalle, dass är sy Uusbildig zem Rettigsanideeter do absolviert het und dä Job mit vyyl Anngaschment uusiebt. Dr Marc Renggli isch für e Umzuug vo dr Sanideet vo dr Hebelstrooss an Züüg-huusstrooss zueständig. Wäärend de näggschte drei Joor wiird dr Standoort an dr Hebelstrooss totalsaniert, äärdbeebesicher und glyymaaneutral gmacht. Drum mien alli Faarzüüg, sämtligs Materiaal und 160 Persoone do aane lo-gischtisch verschoobe wäärde. Für daas isch entlangg dr Züüghuusstrooss zue-sätzlig dä provisorisch schwaarz Konteenerbau entstande. Daas alles under ai Huet zbringe isch jetzt sy nit ganz aifache Job. Dr Neubau het, wie scho erwäänt, im Parterre die groossi Faarzüüghalle. Do sinn nääbem Piggeefaarzüüg, dr Groossruumerettigswaage, e Sanideetska-schtevelo und Sanideetsebike efang pharggiert. E wyteri Faarzüüghalle isch no im Käller unde, wo me sich mit em Zivilschutz und dr Bolizey muess daile D Konstruggzioon vo däne baide Etasche isch uus noohaltigem co2 Beton erstellt woorde. Bym broduziere vo däm Beton, isch mit eme spezielle Verfaare co2 yynebumpt woorde. Ab dr Deggi über em Parterre isch s räschtlige Bauwäärgg in Holz und Droggebauwyys uusgfiert woorde. Groossi verlyymti Holzdräägger nääme s Gwicht vo de oobere Stoggwärgg uff. Drmits staatisch verhebt, sinn die Holzdrägger mit Staalroor dur die oobere Stoggwärgg an de Dachdräägger uffghänggt woorde. Im ooberschte Stogg sinn Büro-, Laager und Uffenthalts-rüüm mit eme offene Atrium underbrocht. Im Uffenthaltsbereich isch d Inneyy-richtig erhoolend und woonlig, aaber als Zwäggbau doch e weeneli z luxeriös uusekoo. Die an dr Nordfassade, über dr Faarzüüghalle zwüsche de Fänschter sängg-rächt bis zem Dach durchgängige hällbruune voorsteende Bänder, sinn kai ar-chiteggtonischi Spiilerey. Es handelt sich um Lüftigskanääl, wo glyychzigt au als Lärm- und Inseggteschutz diene. Hinder dääne isch au e Fänschter. Duet me daas uffmache, luegt me an e schwaarzi Wand vom Lüftigskanaal. S Raffinierte dra isch, dass es dr Usselärm dämmt, aaber so mee früschi Usseluft dur d Umluft yyne losse kaa. Am Schluss hänn mr is wiider in dr Faarzüüghalle droffe. Do het is dr Dreesi no ergläärt, wieso är wiider als Räntner pro Monet stundewyys by dr Rettigssani-deet däätig isch. Drno het är sich im Namme vo de aawäsende Wettstainlemer bym Marc Renggli mit eme glaine Mitbringsel für die interessanti Fierig be-danggt. Dreesi au Diir vyyle Dangg für d Organisazioon. Ych bi mit eme guete Gfüül hai gangge. will ainersyts d Rettigssanideet Basel Stadt im Notfall uff höggschtem Niveau seer schnäll parat isch. Me hets seer guet am grien laufende Bälggli gsee, wo d Zyt vom Uusrugge uff em Bildschirm in dr Faarzüüg halle überbrieffe duet. Die isch nie orange oder root woorde. Andersyts liigt s au an Diir Dressi, will Du wiider derbyy bisch! Dr Abschluss vo däre interessante Fierig hänn mr im Reschtaurant Aescheblatz gnosse. Digge Pfyffer
Dratizioonel isch daas dr Velostamm für d Gümmeler. Dr Flanagan's Irish Pub am Picassoblatz isch dr Dräffphunggt gsi. Vo do us isch me gstaardet. Glyy isch me in d Birsig Daalsoole aabegstürzt. Entlang vom 10-er Drämli isch me Richtig Binnige drampt. Vom Birsig uff d Binnigerhööchi isch scho dr erscht Bäärgbryys koo. Denn über d Bottmiger-boode ischs zer Ziegeley Oberwil aanegrollt. Do hets e Dringghalt gää, um denn Richtig Biel-Bängge wyter zfaare. S Müüligässli isch usser acht glosse woorde, wills wyter Richtig Franggrych no Leyme zem keere gange isch. Uff em Ruggwääg het me denn d Gaartewirtschafft vom Heyer am Müüligässli nit verachdet. Do sinn Kalorie und Flüssigkait für d Haifaart uff Basel noocheglaade woorde. S Wätter, usser eme glaine Zwüschesprutz, isch zem Velofaare aagnääm gsi. Zögge ych ha ghöört, dass es wiider e dolli Uusfaart gsi isch. Merci für d Rou-tewaal und s organisiere. Hesch es guet gmacht, wie allewyyl. Digge Pfyffer
3. Summerstamm 2024 Dr Bruno Reimann het dr Voorschlaag aagmäldet, dass dä Summerstamm uff em Rhystäärn soll stattfinde. So het me sich an dr Schiffländi droffe und uff die sunnig Rhyfaart gfreut. Laider het är nit könne wüsse, dass Baiz nur uff em Ooberdegg offe isch und thechnischi Brobleem mit em Uusfall vo dr 2. Aadriibsschruube bestöön. Drum het dr Rhystäärn dr schööner Dail vo dr Rhyfaart bis zer Birsfäälderschleuse nit könne faare. Dur d Schliessig vom undere Buffet isch me im Ooberdegg, nääbe däre Bum - Bum - Muusig, e Ewigkait in dr Raie gstande bis me nur eppis zdringge griegt het. Drum hänn e baar scho bym erschte Halt dr Schlabbe verloo und sinn uff em Feschtland go verköschtige.
4. Summerstamm 2024 Daas isch dr Jubilaarestamm. Ze däm hänn d Yvette, d Tatjana, dr Peter, dr Hanspi, dr Teddy und dr Ruedi, an Fuess vo dr Schwazwaldbrugg uff dr Groossbaslersyte in s Clubhuus vom Wasserfahrverain „Rhein-Club Breite Basel“, yyglaade. An zwai Sitzige hänn mr dä Aaloss uff d Bai gstellt und uns für dä Standoort, wo so wunderbar über und am Rhy ligt, entschiide. D Fääderfierig hänn mr unserem erfaarene Feschtorganisatoor Peter überloo. Är het mit dr Club-huuswirtin Brigitte d Koschte für d Benutzig uusghandlet, s Bier bym Amsle Martin inkl. Gleeser und die andere Gedrängg organisiert. Uns „Alti wyssi Männer“ het är zer Schellede uffbote. 10 kg Gschwelti für e Häärdöpfelsalat und 6 kg Riebli für e Salat sinn do ghüdet woorde. In synere Kuchi hänn mrs mit groosser Unterstützig vo dr Marianne und em Peter gschafft. Sy hänn denn s Aarichte vo de verschiidene Salat übernoo. Für d Liiferig vom Fläisch-kääs isch d Tatjana zueständig gsi. Für s Dessert hänn alli Jubilaare iire Aadail glaischdet. Ab de halbe siibeni Zoobe sinn denn unseri Glyggekollege yydroffe. Es het uns gfreut, dass bis ze 50-zig Wettstainlemer unserer Yylaadig nooche koo sinn. Die baide Buffet mit em Menu und Dessert sinn guet aakoo. S aagnää-me Wätter het au zer guete Stimmig vo däm schööne Oobe bydrait. Gege Mitternacht isch denn dä Stamm z Änd gange. Allne wo zem Glinge vo däm glungene Jubilaarestamm bydrait hänn, speziell dr Marianne und em Peter Schenk, e groosees Danggeschöön. Digge Pfyffer
D Gschicht vo dr Wettstai Gniembbi-Lambbe Unseri Gniembbi-Lambbe het wortwörtlich e bewegti Zyt hinter sich. In de letschte 35Joor isch die Lambbe scho ordendligg vyyl vo Baiz zue Baiz züglet worde. Unsere ehemolige WAG-Obmaa dr Peter Meyer het vor 10Joor, wo me d Gniemmbi-Lambbe in d Rumpelstuube züglet het, e Reed gschriibe wo unglaublig guet zue däre Gschicht basst: Aafangs 16. Johrhundert het my Ur- Ur- Ur- Ur- Ur- undsowyter Urgroossunggle Jakob Meyer (zem Hasen) en unruehigi Zytt ghaa, är isch immer wider underwäggs gsi, emool dert, emool doo, maischtens als Ryslaifer, also als eidgenössische Söldner. Zerscht als Fähnrich binere Schlacht z Genua, denn als Hauptmaa mit synere Truppe z Pavia, denn z Mailand und anderen Ort. Er isch iberall aggtiv gsi, aber niene lang blibe. Anno 1515 – also vor gnau 500 Johr - isch är denn schlussändlig z Basel sässhaft worde und gly druff aabe sogar als erschte Nit-Aadlige zem Bürgermaischter gwählt worde, uus de Raihe vo de Basler Zimft – är isch nämmlig Schlisselzimftig gsi – wär wunderets… Die Episoode vor 500 Johr mahnt my ganz an unseri aigeni Gschicht vo dr Wettstai Alte Garde. Au mir sinn sit dr Grindig immer wider unterwäggs gsi, emool dert, emool doo. Mir hänn x-mool unser Stammlokal gwäggslet, oder wäggsle miesse, vom Hahn ins Gambrinus, in Stadtkäller, in d Mägd, ins Volggshuus und in Claraschuelhuus-Käller, denn im Herbscht 2010 ins Räbhuus, woo mer aigedlig nit so gligglig gsi sinn, well mir immerwider hänn miesse unseri Stammdisch-Lambbe umhängge! Und hitte, ebbe 500 Johr nohdäm sich dr Jakob Meyer noh lange Wanderjohr nidergloh hett, duet sich au sy Ur- Ur- Ur- Ur- Ur-und sowyter Ur-Neffe mit synere „Truppe“ doo im ehrwürdige, haimelige Rumpelhuus niderloh. Mir sinn gligglig und danggbar, dass uns d Rumpler esoone groosszigig Gaschträcht gwähre, und mir doo inne unseri Stammdisch-Lambbe derfe lychte loh. Ych hoff uffrichtig, dass das Liecht ganz lang nit uuslösche muess…. Jo in etwa so het die Reed gändet… doch die vermeintlichi ewigi Rueh het nur zäh Joor duurt. In dr Zwüschezyt hän sich dWettstai Altgardischte (WAG) entschiide zue de Rumpler zwäggsle. Und es sin neu d Wettstai-Gniembbi gründet worde, wo dr klari Wunsch ka hän, die Lambbe zrugg in d Clique zhole. So hän mir uns 10 Joor nach dere Reed, am Fritig dr 13. Juni mit em Peter Meyer im Stadtkäller troffe. Er het d Lambbe bereits dört ane gschlebbt ka, wo mir sy denn noch e paar Bier wyter via schieffe Eck. (e paar Bier) in Rhyfälderhof broocht hän. Dr Bruno Vetter (Gniembbi) dr Alain Edelmann (Rumpler, ex WAG) und ich hän gmainsam mit em Peter e sauglatte Oobe ka. Es het mir zeigt, dass me au wenn me nümm in dr gliiche Clique Fasnacht macht, immer no e tolli Kameradschaft ka pflääge. In däm Sinn hoffe mr doch mol das unseri Gniembbi-Lambbe im Rhyfälderhof für die nägschte paar Jöörli zur Rueh kunnt und nur gstöört wird wenn mir am Donnschtig dr Stamm hän. Drum Proscht Gniembbi-Lambbe, Proscht Wettstai-Clique. Schnitzge
D Priska Keller het is am Donnschtig 14. Auguscht 2025, ab de säggsi Zoobe, in Gaarte vom FGV Spittelmatte Clubhuus, an d Wettstai Gniembbi Standarte Yyweiig, yyglaade. Döört het uns e Räpplispalter mit syner Frau häärzlig begriesst und hönn is zem Aafang mit kiele Gedrängg bedient. Nooch dr erschte Durschtlöschig sinn mr zum e Ständeli uff s Ströössli uusebätte woorde Zerscht hänn mr s Läggerli mee oder weniger zem Beschte gää! S isch halt länger här gsi, syt em letschte Mool pfyffe und ruesse. Aaschliessend hänn dr Jürg Refer und Pius Keller dr Faanemarsch drummlet, wää-rend däm dr Peter Schenk stolz mit dr verhüllte Faane voorbyy baradiert isch. Drno het dr Obmaa Thomas Brüederlin begriesst und no e baar Woort gsait. Zämmegfasst juscht e so: Uffmerggsaami Zuehörer/inne hänn viilycht an dr GV mitbikoo wär do die Sponsore sinn. Ych waiss dir höörets nit gärn, aber ych möcht dr Yvonne und em Ruedi Hinter-maa rächt häärzlig dangge. Es isch eppis wo mir eerlig gsait e bitz gfäält het. S het scho wee do, ass mr am Bummel d Freie ab voorne nüt kaa hänn. Jetzt hänn mr sii und sinn komplett, noomool häärzligge Dangg. (Noochdraag Redaggzioon: d Faanestange isch im Sponsoring nit inbegriffe, die goot ze Laschte vo dr Glygge) Wo Freud isch, isch au Laid. S Druurkäärtli für unseri vyyl zfrie verstoorbene Pfyffer-instruggtere Sybille, liigt am runde Disch zum unterschryybe uff. Jetzt kunnt dr Fäänrich mit em Enthülligsaggt dra. Dr Peter het dr Yvonne als Faane Gotte grueffe. D Yvonne het d Eer kaa d Standarte z enthülle, wass under groossem Applaus und luute Aah und Ooh bassiert isch. Nooch dr Enthüllig het dr Fäänrich d Faane mit em Faanegruess yygweit. Dr Abschluss vom offizielle Yyweiigsdail hett dr Dambuurmaijoor Gröösse übernoo und dr Wettstaimarsch aagsait. Derno hänn mr e wunderbari Grillade mit feyne Saläät serviert bikoo. Derzue het s Bier, Wyy, Moscht und Mineraalwasser gää. An däm haisse Droopeoobe het daas s Uuseschwitze gförderet. De KuechemacherIne e Danggerscheen, ass sii an die haisse Baggööfe gstande sinn und uns die Kueche spendiert hänn. Nooch em offizielle Dail möcht ych an däre Stell im Namme vo de Wettstai Gniembbi im Peter und sym kreative Brueder, für dä Superwurf ze däre pfundige Standarte, rächt häärzlig dangge. Die Baslerstääb uff wyssem Duech, verdailt um e Wettstai Gniembbi, sinn aifach gail und rysst unseri Standarte no uuse! Wenn ych scho am Dangge by, no e häärzligs Merci dr Priska für s Organisiere und em FGV Spittelmatte Wirtebaar, ass mr hänn döörfe do sy. Digge Pfyffer
